Lýsing

Tónlistarkennarabrautin er viðbótarnám við framhaldsskóla með námslokum á fjórða hæfniþrepi. Námið er 120 einingar og námstími að meðaltali tvö ár. Námið hentar vel þeim nemendum sem hafa hug á að starfa sem tónlistarkennarar og stunda frekara nám á sviði tónlistar og tónlistarkennslu. Um er að ræða hagnýtt nám sem undirbýr tónlistarnemendur undir tónlistarkennslu og fjölbreytt störf á sviði tónlistar.

Lögð er sérstök áhersla á að nemendur fái hagnýta þjálfun og læri að takast á við ólíkar aðstæður í starfi tónlistarkennara. Einnig eigi nemendur að hljóta styrkan grunn í kennslufræði, aukahljóðfæri, samspilskennslu, stjórnun og öðrum greinum sem nauðsynlegar eru til þess að takast á við ólíkar aðstæður í starfi tónlistarkennara. Jafnframt er lögð áhersla á hljóðfæraleik/söng og á að nemendur fái góða grunnmenntun í bóklegum tónlistargreinum.

Námsmat

Lögð er áhersla á að beita fjölbreyttum aðferðum við námsmat og meta vinnu nemenda jafnt og þétt yfir námstímann. Námsmat getur verið fólgið í símati eða lokaprófi eða hvoru tveggja. Við námsmat er tekið mið af þekkingar-, hæfni- og leikniviðmiðum. Kveðið er á um námsmat tiltekinna áfanga í áfangalýsingum. Nemendur taka hljóðfæra-/söngpróf á haust- og vorönn og fá einkunnir fyrir iðni og umsögn kennara á hverri önn. Jafnframt taka nemendur próf í bóklegum greinum við lok hvers áfanga.

Reglur um námsframvindu

Lágmarkseiningafjöldi til þess að útskrifast af brautinni er 120 einingar. Miðað er við að nemandi í fullu námi ljúki 30 einingum á önn og klári því að meðaltali 60 einingar á ári. Í áfangalýsingum koma fram skilyrði um undanfara. Lágmarkseinkunn áfanga er 5 en í einstaka áföngum er skólanum heimilt að gera kröfu um hærri lágmarkseinkunn til þess að nemendur geti tekið framhaldsáfanga í hverju fagi.